Արցախի Հանրապետության Նախագահ Բակո Սահակյանը դեկտեմբերի 8-ին այցելել է Մարտունի շրջկենտրոն եւ անցկացրել աշխատանքային խորհրդակցություն՝ նվիրված շրջանի սոցիալ-տնտեսական զարգացման խնդիրներին:
Զեկույցներով հանդես են եկել շրջվարչակազմի ղեկավար Նելսոն Սողոմոնյանը, տարբեր գերատեսչությունների եւ գյուղական համայնքների ղեկավարները:
Բավարար գնաhատելով 2012 թվականին շրջանում իրականացված աշխատանքները` երկրի ղեկավարը միաժամանակ հորդորել է ներկաներին ուշադրության կենտրոնում պահել բնակչությանը հուզող հարցերը, ընդգծելով դրանց ժամանակին լուծում տալու անհրաժեշտությունը:
Նախագահ Սահակյանը կոնկրետ հանձնարարականներ է տվել շրջանի պատասխանատուներին` աշխատանքները պատշաճ մակարդակով կազմակերպելու եւ իրականացնելու ուղղությամբ:
Խորհրդակցությանը մասնակցում էին փոխվարչապետ Արթուր Աղաբեկյանը, պաշտոնատար այլ անձինք:

2012-12-08